في كل مرحلة من حياتي تمر تجارب كثيرة !
بعضها ينرسخ بالذاكرة وبعضها يتلاشى
تحديداً في شهر فبراير 2011
اصبحت " معلمة " للغة الإنجليزية في إحدى ثانويات الكويت ..
ثلاثة أشهر قضيتها وكانت ؟! الأصـعـب
تجربة بس غيرت حياتي !
تجربة فتحت عيني على أشياء وايد ما كنت أدري إنها موجودة
تجربة .. يا حلوها من تجربة
تعرفت على مجموعة طيبة من المعلمات وبصراحة وااايد خففو الصدمة علي
علموني كل الشي من " الألف إلى الياء "
شلون أكتب تحضيري >> الشي اللي صج كنت اكره
شلون اقَسم وقتي بالصف
شلون أكون عادلة في تقسيم الدرجات
شلون أخلي البنات يشاركون ويحبون المادة
مرت أيام حلوة .. كنا نضحك من قلب ! وتصير مواقف مع الطالبات ما أقدر أمسك نفسي من الضحك
ومرت أيام العكس تماماً ! كنت أرد البيت بس أبجي من التعب
24 ساعة شغل ، هل يعقل ؟
إذا كان الدوام " في الدوام " تهوون ! لكن شغلي أخذه معاي البيت ؟! إحنا بشر يا تربية :)
وأهم نقطة ودي أوضحها ..
قبل لا أدش التربية وأشوف اللي شفته كنت ماخذه فكرة سلبية عن المدرسات إنهم ما يشتغلون ودلع والكادر ما يستحقونه
بس عقب هالتجربة ما يسعني إلا أقول : أرفع قبعتي إحتراماً لكل مدرسة في العالم وأشكرهن على الجهد اللي يبذلونه عشان الأجيال القادمة !
وتكفون سالفة المعاش ؟ حاسدينهم عليه على شنو ؟ ترا كله طاير على شغلهم اللي بالمدرسة
واللي متزوجين .. الله يعينهم ! وين يلحقون على عيالهم و بيوتهم ..
بس إنشالله يقدرون هالناس وظيفتكم اللي مو ناقص إلا بعد " توكلون البنات وتغسلونهم "
